Вештачката интелигенција треба да остане под човечки надзор и да се развива во согласност со меѓународното право, порачаа 20 земји во заедничка декларација усвоена на маргините на Генералното собрание на Обединетите нации.
Во документот се наведува дека ВИ има голем потенцијал за унапредување на науката, економијата и квалитетот на животот, но се предупредува дека брзиот развој на најнапредните модели носи сериозни ризици доколку не се воспостави соодветен надзор.
Меѓу земјите што ја поддржаа декларацијата се Норвешка, Финска, Германија, Холандија, Шпанија, Данска, Ирска, Канада, Австралија, Јужноафриканската Република, Сингапур и Турција. Документот го поддржа и претседателката на Европската комисија, Урсула фон дер Лајен.
САД и Кина, кои се меѓу водечките земји во развојот на вештачката интелигенција, не ја потпишаа декларацијата. Меѓу земјите што не се потписници се и Велика Британија, Франција, Италија, Индија и Јапонија.
Финскиот претседател Александар Стуб, еден од иницијаторите на декларацијата, порача дека е потребен механизам што ќе обезбеди луѓето да ја задржат главната улога во одлучувањето за развојот и употребата на ВИ.
Потписниците ги повикуваат компаниите да воспостават транспарентни безбедносни протоколи, задолжително тестирање пред пуштањето на новите технологии во употреба и независни проценки на ризиците.
Од владите и регионалните организации се бара да работат на заеднички стандарди, поголема транспарентност и заедничко известување за сериозни безбедносни инциденти.
Во декларацијата се повикуваат и државите членки на ОН да ги надградат постојните меѓународни механизми и да разгледаат можност за формирање меѓународна институција која би поставувала стандарди, би вршела верификација и би барала одговорност при надминување на критични прагови.
Стуб ја спореди можната нова институција со Меѓународната агенција за атомска енергија, но истакна дека моделот за нејзино функционирање треба дополнително да се разгледа.
Како главни ризици од недостигот на ефикасен надзор, тој ги посочи можноста за создавање биолошко оружје со помош на ВИ, сајбер-напади извршени од ВИ агенти и употреба на автономни оружени системи.
Сепак, Стуб нагласи дека придобивките од вештачката интелигенција би можеле да бидат значителни доколку технологијата се користи на соодветен и безбеден начин.
