Користењето на ChatGPT и другите чет-ботови со вештачка интелигенција стана дел од секојдневието, но со зголемената употреба расте и ризикот од несвесно споделување чувствителни лични податоци.
Експертите за приватност предупредуваат дека корисниците често не размислуваат доволно за тоа какви информации внесуваат во разговорите со вештачката интелигенција. Според експертите цитирани од „Хафпост“, постојат пет категории податоци со кои треба да се биде особено внимателен.
Првата категорија се податоците со кои може да бидете идентификувани. Целосното име, адресата, телефонскиот број и броевите од пасош, возачка дозвола или други официјални документи не треба да се внесуваат во чет-бот. Нивното споделување може да создаде ризик од злоупотреба на личните податоци, кражба на идентитет или измами.
Внимание е потребно и со интимните детали од личниот живот. Начинот на кој чет-ботовите комуницираат со корисниците може да создаде чувство на приватен разговор, поради што луѓето полесно споделуваат информации кои инаку не би ги објавиле на интернет.
Особено чувствителни се медицинските информации. Според анкета од 2024 година, едно од шест возрасни лица најмалку еднаш месечно користи чет-ботови со вештачка интелигенција за здравствени информации и совети. Експертите советуваат да не се внесуваат медицинска документација и други податоци со кои може да се идентификува пациентот. Доколку е неопходно да се даде здравствен контекст, треба да се отстранат личните податоци.
Корисниците треба да бидат особено внимателни и со доверливите информации поврзани со работата. Интерни деловни документи, извештаи, податоци за клиенти, изворен код или информации заштитени со договор за доверливост не треба да се внесуваат во јавни чет-ботови. Едно прашање што содржи чувствителни деловни податоци може да создаде и регулаторни или договорни проблеми.
Петтата категорија се финансиските информации. Платни списоци, податоци за банкарски и инвестициски сметки, броеви на кредитни картички, даночни пријави и други документи поврзани со приходите не треба да се споделуваат со чет-ботови.
Експертите предупредуваат дека изложувањето на вакви податоци може да доведе до измама, уцена или таргетирани напади со социјален инженеринг. Вештачката интелигенција може да биде корисна за општи совети и информации, но при работа со чувствителни лични или деловни податоци потребна е особена претпазливост.
