Управниот одбор на аеродромот во Нешвил едногласно донесе одлука да започне постапка за преименување на градскиот аеродром во чест на легендарната кантри-пејачка Доли Партон.
Одлуката била донесена со шест гласа „за“ и ниту еден против, а од управата на аеродромот ја опишаа како „прв чекор во повеќеслојна постапка“.
„Официјално е!“, објави Меѓународниот аеродром во Нешвил на социјалните мрежи по гласањето.
Сè уште не е утврдено како точно би гласело новото име на аеродромот. Од управата соопштија дека со надлежните страни работат на тоа на соодветен начин да бидат вклучени името и наследството на Доли Партон.
Партон, една од најпознатите ѕвезди на кантри-музиката, почина минатиот месец на 80-годишна возраст по кратко боледување од рак.
Гувернерот на Тенеси, Бил Ли, ја поздрави одлуката и ја нарече важен чекор кон одбележување на нејзиното наследство.
„Доли секогаш му помагаше на светот да се вљуби во Тенеси“, изјави Ли.
Меѓународниот аеродром во Нешвил годишно опслужува околу 26 милиони патници и, според локалните медиуми, се вбројува меѓу десетте најдобри аеродроми во САД според точноста на летовите и квалитетот на услугите.
