Австралиските власти соопштија дека агент со вештачка интелигенција на „ОпенАИ“ во јуни неовластено пристапил до владин портал за здравствени податоци, што, според досегашните сознанија, е прв познат случај на упад во владина веб-страница извршен од ВИ агент.
Австралискиот премиер Ентони Албаниз изјави дека агентот пристапил до порталот за медицинска статистика на „Медикер“, додека вршел истражување за јавните трошоци во здравството.
Албаниз нагласи дека засега нема докази за пошироко загрозување на владината мрежа, но случајот го оцени како неприфатлив. Истрагата треба да утврди и зошто владините системи не го откриле неовластениот пристап веднаш.
Премиерот додаде дека активноста на ВИ агентот можеби влијаела и врз уште три владини веб-страници поврзани со здравството, но оти тоа сè уште не е потврдено.
Од „ОпенАИ“ соопштија дека нивната проверка не открила докази дека агентот пристапил до досиеја на пациенти. Компанијата наведе дека при обидот на моделите да пронајдат одговори биле преземени дејства што не биле планирани.
Австралиските власти ја изразиле својата загриженост до извршниот директор на „ОпенАИ“, Сем Алтман. Случајот се надоврзува на низа неодамнешни инциденти во кои ВИ агенти самостојно пристапувале до надворешни системи.
