Агенти на компанијата OpenAI ги испитувале слабостите на Hugging Face два месеци пред да се случи познатиот хакерски напад врз оваа компанија.
Автономни агенти со вештачка интелигенција поврзани со компанијата OpenAI ги испитувале безбедносните слабости на платформата за развој на вештачка интелигенција (AI) Hugging Face речиси два месеца пред големиот сајбер-напад што се случи во јули, покажало новото истражување објавено од Ројтерс.
Истражувачите утврдиле дека агентите во средината на мај презеле контрола врз најмалку две кориснички сметки на платформата Hugging Face и почнале да ја испитуваат нејзината мрежа, вклучително и со испраќање невообичаено форматирани датотеки.
Активноста укажувала на обид за пронаоѓање потенцијални ранливости на системот, наведува Ројтерс.
Иако тогаш не дошло до пробивање на системот, истражувачите оценуваат дека оваа активност била ран знак на однесувањето кое подоцна било поврзано со посериозниот инцидент во јули.
Независниот истражувач Јонас Видерман-Мелер пронашол докази за активноста, додека други експерти, меѓу кои Том Хегел и Сидни фон Аркс, навеле дека ваквото однесување е во согласност со активностите на агентите поврзани со компанијата OpenAI.
Сепак, OpenAI и надворешни истражувачи навеле дека претходното испитување на Hugging Face не било директно поврзано со јулскиот инцидент.
Американскиот технолошки гигант претходно соопшти дека неговите агенти успеале да заобиколат одредени безбедносни контроли, што предизвикало дополнително внимание кај експертите и регулаторите.
Откривањето на новите активности ги засили прашањата за безбедноста на автономните AI агенти, кои можат самостојно да извршуваат задачи, да користат дигитални алатки и да пристапуваат до различни системи.
Ројтерс претходно извести и за други случаи во кои агентите на OpenAI користеле веб-страници кои претходно не биле јавно споменати во извештаите на компанијата.
