„Гугл“ се соочува со зголемен притисок од инвеститорите откако приходите од пребарувањето и рекламирањето на матичната компанија „Алфабет“ ги промашија очекувањата, а акциите паднаа за 10 отсто во доцното тргување. Резултатите ги засилија сомнежите дали огромните вложувања во вештачката интелигенција ќе донесат доволно приходи за да ја оправдаат нивната цена.
„Алфабет“ во третиот квартал оствари продажба од 111,2 милијарди долари, без исплатите кон партнерите, под прогнозите на аналитичарите. Приходите од рекламирањето преку пребарувачот и „Јутјуб“ исто така беа послаби од очекуваното. Нето-добивката по акција изнесуваше 2,12 долари, наспроти прогнозата од 2,99 долари.
Дополнителна загриженост предизвикуваат огромните трошоци за развој на вештачката интелигенција. Идните обврски на компанијата за компјутерска моќ, енергија и центри за податоци надминаа еден билион долари, додека капиталните расходи за годинава се очекува да достигнат 205 милијарди долари. Компанијата втор квартал по ред бележи негативен слободен паричен тек.
Притисокот врз „Гугл“ се зголемува и поради конкуренцијата од „Опен еј-ај“ и „Антропик“, чии алатки за вештачка интелигенција стануваат сè попопуларни. Од „Алфабет“ признаваат дека пребарувањата преку новиот AI Mode засега носат помали приходи, но најавуваат воведување повеќе реклами во оваа услуга.
Сепак, „Гугл Клауд“ беше светла точка во извештајот. Одделот оствари приходи од 30,7 милијарди долари и добивка од 11,1 милијарда долари, надминувајќи ги очекувањата на аналитичарите.
Извршниот директор Сундар Пичаи најави нови модели на вештачка интелигенција, вклучително и поефикасни решенија за програмерите. Компанијата се обидува да го забрза развојот и да ја задржи конкурентноста, додека инвеститорите очекуваат јасни докази дека огромните вложувања ќе се претворат во поголеми приходи.
