Холивудските актери понекогаш добиваат милионски хонорари за филмови во кои на крајот воопшто не се појавуваат. Причините се различни: нивните сцени се исфрлаат при монтажата, ги заменуваат други актери или продукцијата целосно се откажува од снимањето. Сепак, договорите во некои случаи им овозможуваат да ги задржат парите.
Меѓу нив е Шејлин Вудли, која требало да ја игра Мери Џејн Вотсон во филмот „Неверојатниот Спајдермен 2“ од 2014 година. Таа снимила три сцени, но сите биле исфрлени од конечната верзија на филмот, иако актерката го добила хонорарот.
Џони Деп, пак, требало повторно да го игра Гелерт Гринделвалд во „Фантастични ѕверови: Тајните на Дамблдор“ од 2022 година. По обвинувањата од Амбер Херд и нивниот судски спор, Деп бил заменет со Мадс Микелсен. Иако снимил само една сцена, според текстот, договорот му овозможил да го добие целиот хонорар од 16 милиони долари.
И Пол Рад требало да се појави во комедијата „Деверуши“ од 2011 година. Тој снимил сцена во која требало да биде состанок на главниот лик, но таа не влегла во конечната верзија. Рад сепак бил платен.
Тоби Мегваер бил избран за улога во филмот „Животот на Пи“ од 2012 година, но режисерот Енг Ли подоцна одлучил да го замени со Раф Спал, бидејќи сметал дека Мегваер е премногу познат. Според објаснувањето на режисерот, целта била да се задржи меѓународниот состав на актерите.
На списокот е и Николас Кејџ, кој требало да го глуми Супермен во филмот „Супермен живее“, во режија на Тим Бартон. Филмот никогаш не бил реализиран, но, според објавените информации, Кејџ наводно добил 20 милиони долари.
