Актерот Џеси Меткалф, најпознат по улогата на Џон Роланд во хит-серијата Очајни домаќинки, конечно откри зошто ја напуштил серијата по првата сезона.
Фановите добро се сеќаваат на неговиот лик – млад градинар кој имаше љубовна врска со Габриел Солис, лик кој го толкуваше Ева Лонгорија.
Иако серијата продолжи уште седум сезони, Меткалф не остана дел од постојаната актерска екипа. Во гостување во подкастот „Not Skinny But Not Fat“, тој објасни дека продукцијата едноставно не знаела во кој правец да го развива неговиот лик.
„Добив отказ од серијата. По првата сезона не знаеја како понатаму да ја развиваат мојата приказна“, изјави Меткалф.
Тој го прераскажа и разговорот со креаторот на серијата Марк Чери, кој му рекол:
„Ова не се ‘Очајни градинари’, туку ‘Очајни домаќинки’, па за жал повеќе нема да бидеш дел од главната екипа“.
Меткалф додава дека отказот не го погодил премногу, бидејќи веднаш добил нова можност – главна улога во филмот John Tucker Must Die, во продукција на 20th Century Fox.
„Бев на бранот на успехот. Серијата ме прослави и ми се отвораа многу врати“, се присети актерот.
Иако не беше дел од постојаната екипа, Меткалф подоцна неколкупати се враќаше како гостин во серијата.
Покрај успехот, актерот се соочил и со притисок поради статусот на секс-симбол. Како што истакна, честото појавување без маица во серијата создало нереални очекувања постојано да биде во совршена форма.
„Тоа не е реално. Луѓето очекуваат да изгледате исто во секој момент, а тоа едноставно не е возможно“, заклучи Меткалф.
