Македонскиот боксер Ален Рустемовски денеска беше на прием кај министерот за спорт Борко Ристовски, по освоениот бронзен медал на Европското првенство во Софија.
За постигнатиот успех и промоцијата на Македонија, Рустемовски го доби статусот „Спортист од светска категорија“, со кој во наредните четири години ќе добива финансиска поддршка во висина од две просечни плати.
Бронзениот медал од Европското првенство е уште еден значаен успех за Рустемовски во последниот период. Тој претходно освои бронза и на Медитеранските игри во Таранто.
„Ален, честитки за историскиот успех! Македонија верува во тебе и ќе продолжи да стои зад тебе на патот кон нови европски, светски и олимписки предизвици“, порача Ристовски преку социјалните мрежи.
