„Амазон“ планира изградба на огромен центар за податоци во Тексас, наменет за развој на вештачка интелигенција, кој поради големата потрошувачка на енергија би можел да стане најголемиот поединечен извор на емисии на јаглерод диоксид во САД, пишува „Фјутуризм“, повикувајќи се на „Њујорк тајмс“.
„Амазон веб сервисис“ потврдил инвестиција во нова гасна термоелектрана која би го снабдувала центарот за податоци во округот Пекос. Електраната би имала капацитет до 7,65 гигавати, а 35-те турбини би можеле годишно да испуштаат околу 33 милиони тони CO₂.
Таквата количина емисии е споредлива со вкупните годишни емисии на цели држави, како Швајцарија, Ирска или Бугарија.
Планираниот проект отвора и прашања околу климатските цели на „Амазон“, кој претходно се обврза до 2040 година да постигне нето-нулта стапка на емисии на јаглерод.
„Светот денес изгледа поинаку отколку во времето кога ја поставивме климатската обврска“, изјавила портпаролката на компанијата, Маргарет Калехан, за „Њујорк тајмс“.
Во меѓувреме, емисиите на „Амазон“ веќе бележат значителен раст. Компанијата минатата година регистрирала рекордно зголемување на вкупните емисии, додека потрошувачката на електрична енергија во 2025 година пораснала за 34 отсто.
