Хрватска и ова лето останува најпопуларна туристичка дестинација за граѓаните на Словенија, покажува анкета на институтот „Медиана“, пренесе словенечката агенција СТА.
Според резултатите од истражувањето, повеќе од половина од испитаниците планираат летниот одмор да го поминат во Хрватска, иако интересот бележи благ пад во споредба со минатата година.
Анкетата покажува и дека оваа година повеќе Словенци ќе патуваат на одмор. Лани 29 проценти од испитаниците изјавиле дека нема да патуваат, додека годинава тој процент се намалил на 23.
Се забележува и тренд на подолги летувања. Процентот на туристи кои планираат повеќе од 10 ноќевања пораснал од 25 на 29 проценти, додека значително се намалил бројот на оние кои избираат кратки одмори од само неколку дена.
Покрај Хрватска, дел од словенечките туристи ќе летуваат и во Словенија, Грција, Италија, Албанија, Шпанија и Турција.
Најголем дел од туристите, односно 41 процент, ќе престојуваат во приватни апартмани и соби, додека 28 проценти ќе изберат хотели. Интересот за кампување е значително намален во споредба со минатата година.
Истражувањето било спроведено од 21 до 23 април преку интернет анкета на репрезентативен примерок од 500 полнолетни жители на Словенија.
