Компанијата Anthropic е во преговори за купување на стартапот за вештачка интелигенција Decart за околу 6 милијарди долари, објави „Блумберг“, повикувајќи се на извори запознаени со преговорите.
Decart развива таканаречени „светски модели“ кои со помош на вештачка интелигенција го симулираат физичкиот свет, како и технологија за поефикасно користење на AI чиповите и намалување на трошоците за обука на моделите.
Технологијата би можела да му помогне на Anthropic подобро да ја искористи постојната компјутерска инфраструктура и да одговори на растечката побарувачка за своите услуги базирани на вештачка интелигенција.
Decart во мај собра 300 милиони долари, со што компанијата беше проценета на околу 4 милијарди долари. Доколку договорот биде постигнат за 6 милијарди долари, тоа би претставувало значителна премија во однос на последната проценка.
Една од технологиите на Decart овозможува уредување видео во живо во реално време. Моделот Lucy, на пример, може да анализира снимка од лице и да создаде видеа со висока резолуција на кои изгледа како лицето да пробува различна облека или додатоци.
Технологијата на компанијата веќе се користи во онлајн трговијата, рекламирањето и платформите за пренос во живо, меѓу кои Twitch, TikTok и YouTube. eBay е и инвеститор и корисник на технологијата на Decart.
Од Anthropic и Decart засега одбиле да ги коментираат информациите за преговорите.
