Apple предупреди рекорден број корисници ширум светот дека нивните уреди можеби биле цел на напредни шпионски напади.
Компанијата во петокот испрати безбедносни известувања до корисници во 110 земји, предупредувајќи ги за таканаречен „платенички шпионски софтвер“, кој најчесто се поврзува со државни и воени разузнавачки служби.
Организациите за дигитални права и сајбер-безбедност, меѓу кои Access Now и iVerify, пријавиле рекорден број корисници кои побарале помош откако ги добиле известувањата од Apple. Според експертите, бројот на пријави е за 30 до 40 отсто поголем во споредба со претходните вакви предупредувања.
Меѓу оние кои добиле известувања има и голем број украински војници и припадници на вооружените сили. Експертите предупредуваат дека регистрираните случаи можеби се само дел од поширока сајбер-шпионска активност.
Од организацијата The Citizen Lab, која со години ги истражува државните сајбер-напади, оценуваат дека обемот и географската распространетост на најновиот бран предупредувања укажуваат на поширок проблем.
Големиот број реакции, сепак, делумно се поврзува и со новиот систем за известување на Apple. Предупредувањата сега се појавуваат директно на заклучениот екран на iPhone, во поставките на уредот, преку електронска пошта и при најавување на Apple-сметката преку интернет.
Apple засега нема официјално соопштение за најновиот бран предупредувања, но експертите советуваат корисниците ваквата порака да ја сфатат сериозно. Станува збор за предупредување кое се разликува од вообичаените измами и „phishing“ напади и укажува дека уредот можел да биде цел на високо софистициран напад.
Особено се загрозени новинари, активисти, политичари и воени претставници.
На корисниците кои го добиле предупредувањето им се советува веднаш да ја активираат функцијата Lockdown Mode. Станува збор за специјален безбедносен режим достапен на iOS, iPadOS и macOS, кој значително ограничува одредени функции на уредот со цел да се намалат можностите за напад.
