Селекторот на аргентинската фудбалска репрезентација, Лионел Скалони, одлучи Лионел Меси да не биде во стартниот состав за натпреварот од последното коло во групната фаза на Светското првенство против Јордан.
Аргентинскиот селектор реши да го одмори капитенот и најголемата ѕвезда на тимот пред почетокот на нокаут-фазата, потврдувајќи дека Меси натпреварот ќе го започне од клупата, но ќе добие шанса да настапи во второто полувреме.
Актуелниот светски шампион веќе го обезбеди првото место во групата Ј, па дуелот со Јордан нема резултатско значење во однос на пласманот. Токму затоа Скалони одлучи да ги сочува носителите на играта за елиминациската фаза, која започнува веќе во недела.
„Лео ќе биде на клупата. Ќе почекам уште малку со објавувањето на конечниот стартен состав, но сигурно ќе влезе во игра подоцна“, изјави Скалони.
Покрај Меси, се очекува од првата минута да настапат фудбалери кои досега имаа помала минутажа на турнирот, додека стандардните првотимци ќе добијат заслужен одмор пред најважните натпревари што следуваат.
Меси зад себе има одлична групна фаза. Капитенот на Аргентина ги постигна сите пет погодоци на својата репрезентација на овој Мундијал, со што го надмина рекордот на Мирослав Клосе и со вкупно 18 голови стана најдобар стрелец во историјата на светските првенства.
