Аргентина по голем пресврт ја совлада Англија со 2:1 и обезбеди пласман во финалето на Светското првенство 2026, каде што за титулата ќе се соочи со Шпанија. Англичаните, пак, ќе играат против Франција во натпреварот за третото место.
По елиминацијата, селекторот на Англија, Томас Тухел, не го криеше разочарувањето, а воедно одговори и на критиките што веќе почнаа да пристигнуваат од англиската јавност.
„По секој натпревар постојат милиони селектори кои мислат дека знаат подобро“, изјави Тухел.
По последниот судиски свиреж, аргентинските фудбалери прославија со транспарент на кој пишуваше: „Фокландските Острови се аргентински“, испраќајќи политичка порака по големата победа.
Поранешниот капитен на Англија, Вејн Руни, беше исклучително критичен кон настапот на националниот тим.
„Дојдовме во одлична позиција, а потоа немавме идеја што треба да правиме. Се повлековме и им дозволивме да нè притиснат. Создадоа многу шанси и на крајот едноставно се распаднавме. Навистина сум разочаран“, изјави Руни за Би-Би-Си.
Капитенот Хари Кејн призна дека поразот тешко му паднал.
„Скршен сум поради играчите, поради целиот тим, стручниот штаб и навивачите. Долго време имавме контрола на натпреварот, но кога поведовме со 1:0, се обидовме само да ја зачуваме предноста, а тоа на ова ниво не е доволно. Ужасно се чувствувам, бидејќи сите напорно работевме за да стигнеме дотука“, изјави Кејн.
Во големото финале Аргентина ќе игра против Шпанија, додека Англија ќе се бори со Франција за третото место на Мундијалот.
