Белгиец потрошил околу 10.000 евра, убеден дека е во емотивна врска со канадската пејачка Селин Дион, но всушност бил жртва на интернет-измама преку која измамниците се претставувале како познатата пејачка.
Неговата ќерка Карла раскажала дека нејзиниот татко редовно испраќал пари на лице кое преку пораки се претставувало како Селин Дион и тврдело дека се наоѓа во финансиски тешкотии, пренесе телевизијата БФМ.
Парите ги испраќал преку картички за подароци во вредност од 200 до 300 евра, кои ги купувал во продавниците на „Карфур“.
„Во пресрет на Нова година 2025 година, татко ми цел ден седеше пред влезната врата, со спакувани куфери“, раскажала Карла. Тој очекувал такси да го однесе до аеродром, од каде што, наводно, со приватен авион требало да биде пренесен во САД.
„Сам платил цело богатство. Секако, никој не дојде“, додала таа.
Семејството се обидело да го убеди дека станува збор за измама, но без успех. Според Карла, нејзиниот татко на измамниците им испратил и лични податоци за членовите на семејството, вклучително и фотографии, адреси и информации за внуците.
„Поради тоа не се чувствуваме безбедно“, заклучила таа.
