Белгискиот угостител Јеф Де Вос постави светски рекорд во непрекинато приготвување помфрит, откако во својот киоск во белгискиот град Равелс поминал најмалку 150 часа без прекин покрај фритеза.
Сопственикот на локалот „El Leker“ го срушил претходниот рекорд кој го држел негов колега од местото Мерелбеке-Меле, откако речиси шест дена со минимални паузи непрекинато подготвувал помфрит, пренесува VRT.
Де Вос, кој пржи помфрит без прекин од 13 часот минатиот четврток, навел дека за време на подготовката правел кратки паузи во утринските и вечерните термини, додека најтешки моменти биле раните утрински часови кога немало муштерии.
„Не можеш целосно да се подготвиш за ваков притисок, но одлучив да одам до крај“, рекол тој.
Неговата партнерка Маријан Биленс истакнала дека целиот подвиг барал извонредна организација и заеднички напор, со постојана работа без разлика на заморот.
Де Вос додал дека за време на „маратонoт“ го изгубил апетитот за помфрит, иако претходно често јадел додека работел.
„Гледав премногу помфрит овие денови, па желбата малку ми се намали“, рекол тој.
Иако рекордот веќе е официјално срушен, белгискиот угостител планира да продолжи да работи до 200 часа, односно до крајот на неделата. Според неговите зборови, целиот вишок храна во текот на ноќните часови не бил фрлан, туку бил дониран.
