Американскиот музички продуцент Бени Бланко се најде на мета на критики поради насловната фотографија за неговиот нов албум „Hermoso“, инспириран од латино музиката.
Албумот ќе содржи осум песни, чии наслови се на шпански јазик, но токму изгледот на насловната страна предизвика поделени реакции на социјалните мрежи. Дел од корисниците сметаат дека маската прикажана на неа претставува претерана и навредлива карикатура на Латиноамериканците, додека други тврдат дека станува збор за карикатура на самиот Бланко и дека тој всушност се шегува со сопствениот изглед.
„Ова изгледа расистички кон сите раси“, напиша еден корисник на мрежата X, додека друг го критикуваше Бланко поради тоа што, како што наведе, се обидува да присвои култура која не е негова.
Дел од корисниците, сепак, застанаа во негова одбрана. Според нив, маската е намерно претерана верзија на неговото лице и нема цел да ги исмева Латиноамериканците.
Бланко и претходно зборувал за критиките за својот изглед и за негативните коментари што ги добива на интернет. Тој открил дека дури и неговата сопруга Селена Гомез понекогаш не може да поверува колку добро се справува со таквите реакции.
Продуцентот вели дека не ги следи редовно коментарите на интернет, а најчесто за нив дознава кога пријателите ќе му ги покажат. Според него, со текот на годините научил да не им придава преголемо значење на негативните коментари.
