Белград е опишан како „Берлин на Балканот“ во текст на новинарката Оливија Јанг, објавен во туристичкиот магазин AFAR. Таа го издвојува градот поради спојот на бунтовнички дух, пониски цени, улична уметност и богат ноќен живот.
Јанг во својот текст го опишува Белград како град на контрасти, каде што бруталистичката архитектура и трагите од минатото се мешаат со современата уметност, кафулињата, хотелите и музичката сцена. Посебно ги издвојува Савамала и Дорќол, каде што се среќаваат големи мурали и различни архитектонски стилови.
Авторката посочува дека ноќниот живот е една од препознатливите одлики на градот, од сплавовите на Сава и Дунав до рејв-забавите во хали и магацини во текот на постудените месеци.
Според Јанг, Белград во последните години станува сè попривлечен за странските туристи, меѓу другото поради пониските цени во споредба со некои популарни европски градови, како и поради развојот на технолошкиот сектор и подготовките за Експо 2027.
Токму спојот на историјата, архитектурата, уметноста, храната и ноќниот живот, според нејзиниот опис, му дава на Белград карактер поради кој го споредува со „Берлин на Балканот“.
