Вештачката интелигенција мора да биде подложена на строги ограничувања, бидејќи ризиците од нејзиниот развој би можеле да ги надминат потенцијалните придобивки, предупреди коосновачот на „Мајкрософт“, Бил Гејтс.
Во текст објавен на неговата страница „Gates Notes“, Гејтс оцени дека одлуките што се носат во овој момент ќе бидат клучни за тоа дали вештачката интелигенција ќе стане алатка за поголема еднаквост или ќе создаде нови форми на неправда.
Тој предупреди на можноста за масовна загуба на работни места, негативно влијание врз образованието и развојот на децата, но и на ризикот моќните модели да бидат злоупотребени од криминалци и други злонамерни актери.
Гејтс сепак смета дека вештачката интелигенција може да донесе големи придобивки, особено во медицината и земјоделството, вклучително и во спречувањето и лекувањето болести.
Како едно од решенијата, тој предлага воведување данок на вештачката интелигенција или роботите, по примерот на даноците што се плаќаат на трудот, со цел да се забави замената на човечката работна сила. Смета и дека одредени професии треба да останат резервирани исклучиво за луѓе.
Гејтс предупреди дека државите мора да реагираат пред масовната невработеност и општествените последици да станат сериозен проблем.
