Во една болница во Финска се случила необична семејна случајност – две сестри близначки се породиле во ист ден, во истата болница, а на двата пораѓања била присутна иста бабица.
Необичниот настан се случил на Клиниката за жени при Универзитетската болница во Турку. Болницата ја споделила приказната на својот профил на Фејсбук, заедно со фотографија од двете новопечени мајки, нивните бебиња и бабицата Јохана, која учествувала во двата пораѓања.
Од клиниката посочиле дека станува збор за навистина несекојдневна случајност, поставувајќи го прашањето колкава е веројатноста сестри близначки да се породат во ист ден, а на двата пораѓања да биде присутна иста бабица.
Целиот настан од болницата го опишале како „прекрасна и посебна случајност“. Приказната за кратко време привлече големо внимание, па само еден ден по објавувањето фотографијата и текстот собрале речиси 17.000 реакции на Фејсбук.
Корисниците упатиле честитки до двете сестри, нивните новороденчиња, но и до бабицата Јохана, која се нашла во центарот на оваа несекојдневна семејна приказна.
„Понекогаш животот носи чудесни и среќни случајности. Честитки до мајките близначки, бебињата и прекрасната бабица“, напишал еден од корисниците.
Друг случајноста ја опишал кратко: „Запишано во ѕвездите“, додека друг корисник напишал дека тоа е „неверојатен спомен“.
Финските медиуми не објавиле дополнителни приватни информации за мајките и нивните бебиња. Од болницата, исто така, не соопштиле колку време поминало меѓу двата пораѓања.
