Болката во коленото е чест проблем кај возрасните, особено по 40-тата година, а најчесто е поврзана со абење на зглобовите и остеоартритис. Сепак, лекарите предупредуваат дека постои еден вид болка што не треба да се игнорира.
Ортопедскиот хирург Сајед Надим Абас вели дека посебно внимание треба да се обрне на болката што е поизразена во мирување отколку при движење или на болката што го буди пациентот среде ноќ.
„Таквата болка не треба автоматски да се припишува на стареењето или на абењето на зглобовите. Потребно е навремено да се испита“, предупредува Абас.
За разлика од тоа, болката предизвикана од остеоартритис или прекумерно оптоварување најчесто се намалува при одмор.
Иако се работи за многу ретки случаи, лекарите посочуваат дека болката што се влошува ноќе може да биде и еден од симптомите на рак на коските. Според британскиот Национален здравствен систем (NHS), болката што е поизразена во текот на ноќта е меѓу можните знаци на ова заболување.
Абас додава дека хондросаркомот, најчестиот примарен рак на коските, најчесто се јавува кај лица постари од 40 години. Освен во коленото, симптомите можат да се појават и во карлицата, градниот кош, рацете, лопатките и другите делови од нозете.
Сепак, специјалистите нагласуваат дека примарниот рак на коските е исклучително редок. Ноќната болка во коленото може да биде предизвикана и од ревматоиден артритис, гихт, воспаление на тетивите, бурзитис, Осгуд-Шлатерова болест, повреди, па дури и од недостиг на витамин Д.
„Здравите колена обично не болат ноќе. Ако се јави таква болка, најчесто постои причина што треба да се утврди“, вели ортопедскиот хирург Ким Стернс.
Доколку болката во коленото трае подолг период, ве буди во текот на ноќта или се влошува, лекарите советуваат да се побара лекарски преглед за навремено утврдување на причината.
