Бред Пит официјално се враќа во главната улога во долгоочекуваното продолжение на филмот „Светска војна З“ (World War Z), кое го подготвува студиото Paramount.
Едвард Бергер, режисерот на филмовите „На запад ништо ново“ и „Конклава“, потпиша договор за режирање на продолжението според сценарио на Денис Кели. Деталите за дејството на продолжението засега се чуваат во тајност, открива „Дедлајн“.
Бред Пит ќе го продуцира продолжението заедно со Деде Гарднер и Џереми Клајнер во име на продукциската куќа Plan B, додека Бергер ќе биде извршен продуцент.
Оригиналниот филм „Светска војна З“, заснован на бестселерот на Макс Брукс од 2006 година „World War Z: An Oral History of the Zombie War“, заработи повеќе од 540 милиони долари ширум светот.
Филмот, кој го режираше Марк Форстер, го следеше Бред Пит во улогата на Гери Лејн, поранешен вработен во Обединетите нации, кој се трка со времето за да ја запре пандемијата на зомби.
Paramount во април, на манифестацијата CinemaCon, објави дека продолжението конечно е во активна фаза на развој, по повеќе обиди да се сними нов филм. Меѓу нив беше и верзијата што требаше да ја режира Питовиот чест соработник Дејвид Финчер, но тој проект беше откажан во 2019 година.
Веста за продолжението на „Светска војна З“ пристигнува за време на промотивната турнеја на Пит за неговиот најнов филм на Paramount, „Heart of the Beast“, кој наскоро пристигнува во кината. Овој трилер за преживување, во режија на Дејвид Ајер, го следи припадникот на специјалните сили и неговото куче обучено за борба кои, по разорен пад на авион, остануваат заробени длабоко во дивината на Алјаска.
Пит потоа ќе ја повтори својата со Оскар наградена улога во филмот на Netflix „Авантурите на Клиф Бут“ (The Further Mis-Adventures of Cliff Booth), кој ќе го режира Финчер според сценарио на Квентин Тарантино. Филмот глобално ќе биде прикажан во IMAX кината на 25 ноември, а на стриминг пристигнува на 23 декември.
Следен е „The Rider“, филм кој Пит и Бергер го завршија на почетокот на оваа година и кој моментално се наоѓа во постпродукција.
