Американски лекари постигнаа значаен успех во ксенотрансплантацијата, откако бубрег од генетски модифицирана свиња функционирал во телото на човек цели 271 ден, што претставува нов рекорд.
Пациентот Тим Ендруз од САД живеел со трансплантираниот свински бубрег повеќе од девет месеци, без потреба секојдневно да оди на дијализа. Тој изјавил дека операцијата му дала надеж и значително го променила неговиот живот.
Бубрегот на крајот престанал да функционира и бил отстранет, по што Ендруз кратко време повторно одел на дијализа. Во меѓувреме била пронајдена соодветна личност која донирала човечки бубрег, па пациентот добил нов орган.
Американските лекари велат дека досега не е забележано животински орган толку долго да функционира во човечко тело. Тие сметаат дека органите од свињи во иднина би можеле да служат како своевиден „мост“ за пациентите кои чекаат соодветен човечки орган за трансплантација.
Ксенотрансплантацијата, односно користењето органи од други животински видови кај луѓето, последните години е предмет на интензивни истражувања поради хроничниот недостиг на органи за трансплантација.
Во САД околу 100.000 луѓе чекаат трансплантација на бубрег, додека годишно се изведуваат околу 25.000 вакви трансплантации.
Свињите се сметаат за еден од најсоодветните животински видови за оваа намена бидејќи нивните органи се со приближна големина на човечките, а постои и долгогодишно искуство во нивното контролирано одгледување.
Истражувачите развиле и таканаречени јукатански минијатурни свињи, чии гени биле значително изменети. Кај нив се направени 69 генетски модификации со цел нивните органи полесно да можат да се приспособат за употреба кај луѓе.
Овој случај претставува уште еден чекор во развојот на ксенотрансплантацијата и отвора можност животинските органи еден ден да помогнат во надминување на недостигот на органи за трансплантација.
