Поранешната четврта тенисерка во светот, Доминика Цибулкова, смета дека Ига Швјонтек има квалитет повторно да стане светски рекет број еден, и покрај послабите резултати во изминатата година и пол.
Полската тенисерка моментално се наоѓа на осмото место на ВТА-листата, откако не успеа да ја одбрани титулата на Вимблдон, каде што беше елиминирана во третото коло од Алекс Ијала.
Според Цибулкова, најголемиот проблем на Швјонтек не е играта, туку менталниот пристап.
„Навивам за Ига Швјонтек. Мислам дека во мечевите што ги губи, таа всушност губи од самата себе“, изјави словачката тенисерка.
Таа додаде дека кога Швјонтек е психолошки стабилна и самоуверена, многу малку тенисерки можат да ја победат.
„Сè е прашање на самодоверба. Секако дека треба многу да се тренира, но ако не сте во вистинска психолошка состојба, можете да ја изгубите самодовербата по само еден натпревар“, истакна Цибулкова.
Ига Швјонтек досега има освоено 25 ВТА-титули, меѓу кои и шест гренд слем трофеи – четири на Ролан Гарос, еден на УС Опен и еден на Вимблдон.
Таа вкупно 125 недели беше на врвот на ВТА-листата, а последен пат првото место го држеше во октомври 2024 година.
„Сигурна сум дека може да се врати на првото место. Навистина верувам дека повторно ќе биде број еден“, порача Цибулкова.
