Капитенот на Хрватска, Лука Модриќ, не го криеше разочарувањето по поразот од Португалија (2-1) и елиминацијата од Светското првенство, а најостри критики упати кон судењето и употребата на ВАР.
На прашањето дали ова бил негов последен настап за репрезентацијата, искусниот играч не сакаше да даде конкретен одговор.
„Не е време сега да зборувам за тоа. Наскоро ќе дознаете“, изјави Модриќ.
Тој смета дека Хрватска одиграла многу подобро во второто полувреме и дека имала можност порано да го реши натпреварот, но дека судиските одлуки значително влијаеле врз конечниот исход.
Посебно се осврна на поништениот погодок на Хрватска во судиското продолжение.
„Судијата вели дека Матановиќ играл со топката, но од снимките не се гледа никаков контакт. Ако нема допир, тогаш нема ниту офсајд“, рече капитенот.
Модриќ ја критикуваше и одлуката по интервенцијата на ВАР да биде досуден пенал за Португалија.
„Да беше ситуацијата обратна, сигурен сум дека ВАР немаше да се вклучи. Од самиот почеток не ми се допаѓаше оваа технологија. Може да биде корисна, но само кога се користи правилно. ВАР треба да интервенира само кога судиската грешка е целосно јасна. Во оваа ситуација немаше пенал, двајцата играчи се оттурнуваа и паднаа“, изјави Модриќ.
Тој додаде дека ваквите одлуки често одат на штета на Хрватска, но нагласи дека не бара алиби за поразот.
„Не бараме оправдување, но ваквите одлуки решаваат натпревари, ја менуваат атмосферата и влијаат на сè за што се борите. Особено е тешко кога ќе ги видите помладите соиграчи како плачат по ваков пораз“, истакна Модриќ.
Хрватскиот капитен призна дека елиминацијата многу боли, но додаде дека победите и поразите се составен дел од фудбалот.
