Хрватската старлета Ава Карабатиќ oбјави на социјалните мрежи фотографија на која е врзана за кревет, со видлива модринка под окото и исплашен израз на лицето.
Фотографијата ја објавила на Инстаграм Стори со кратката порака: „Да се знае вистината“.
Објавата доаѓа само неколку дена откако Карабатиќ објави фотографии од модринките на лицето и обвини дека нејзиниот партнер Лазар Иван ја држел против нејзина волја, како и дека без нејзина согласност снимал и објавувал фотографии и видеа на интернет.
Според пишувањата на српските медиуми, Карабатиќ, која е хрватска државјанка, неодамна била приведена во Белград. Таа, наводно, успеала да му побегне на партнерот и се упатила кон хрватскиот конзулат, каде што побарала помош и пријавила насилство.
При проверката на нејзините документи, според истите информации, било утврдено дека ги прекршила правилата за престој на странски државјани во Србија, по што била приведена и случајот бил предаден на надлежен прекршочен судија. По разгледувањето на предметот, таа била предадена на Управата за странци.
Нејзиниот партнер, пак, наводно не бил пронајден во станот и се води како недостапен за полицијата по пријавата за насилство.
Случајот дополнително привлече внимание по информациите дека, и покрај претходните обвинувања, Карабатиќ и партнерот повторно биле видени заедно. Според сведоци, тие седеле во угостителски објект, се расправале, а потоа заедно го напуштиле местото.
Инаку, ова не е првпат Карабатиќ да го обвини партнерот за насилство. Пред неколку месеци таа пријавила малтретирање, но подоцна повторно објавувала фотографии со него и тврдела дека се заедно.
