Дачија ја изгради својата репутација врз едноставноста, но едно копче во нејзините современи автомобили возачите го користат повеќе од кое било друго.
Станува збор за копче со кое се исклучуваат звучните предупредувања на напредните системи за помош на возачот (ADAS), а извршната директорка на Дачија, Катрин Ат, го нарекува „магично копче“.
„Најкористеното копче во нашите автомобили е таканареченото магично копче, со кое можете да ги исклучите сите звучни предупредувања од ADAS системите“, изјавила Ат за британското списание Autocar.
Копчето го носи називот „My Safety“, а е воведено за возачите полесно да пристапат до посакуваните поставки на ADAS системите.
Дачија наведува дека системот им овозможува на возачите за време на возењето да деактивираат одредени системи за помош, а со притискање на физичкото копче повторно да ги активираат претходно избраните поставки.
Станува збор за интересна изјава од компанија чија филозофија се заснова на тоа на купувачите да им го понуди она што им е потребно, без дополнително наплаќање на голем број функции.
Кога станува збор за прописите на Европската Унија и безбедносните протоколи што производителите на автомобили мора да ги исполнуваат, Ат вели дека големиот број нови барања сè повеќе го отежнува производството на автомобили по пристапни цени, по што Дачија е позната.
Токму поради тоа постои и „магичното копче“. Тоа не значи дека Дачија ги смета ADAS системите за бескорисни, ниту дека смета оти безбедносните системи треба да исчезнат. Наместо тоа, компанијата поставува прашање дали секое ново регулаторно барање има подеднакво оправдување кога станува збор за мали и ценовно достапни автомобили.
