Џони Деп е подготвен повторно да го облече пиратскиот костим и да се врати во улогата на капетанот Џек Спероу доколку продолжи филмскиот серијал „Пиратите од Карибите“. Сепак, актерот откри дека има посебна причина поради која би прифатил повторно да биде дел од франшизата – сака приказната за неговиот лик да добие подобар завршеток.
Во разговор за „Entertainment Tonight“, Деп изјавил дека единствениот ангажман што навистина го посакува е да му помогне на ликот достојно да се збогува со публиката. Притоа, ја истакнал и довербата што ја има во продуцентот Џери Брукхајмер, со кого, како што рекол, би соработувал во секој момент.
Деп беше главната ѕвезда во петте филма од серијалот, снимени и прикажувани во периодот од 2003 до 2017 година. Последното продолжение, „Мртвите не раскажуваат приказни“, беше прикажано во 2017 година.
Во меѓувреме, Брукхајмер работи на нов филм, чиј сценарист е Џеф Натансон. Продуцентот уште во 2022 година најави дека се блиску до шестото продолжение и дека имаат добро сценарио. Тој тогаш посочи дека се размислува и за повторно започнување на франшизата, што би овозможило полесна организација на продукцијата.
Покрај овој проект, во развој е и филм со Марго Роби во главната улога, чијашто приказна требало да биде повеќе насочена кон женските ликови. Брукхајмер изјавил дека се надева оти ќе бидат реализирани двата филма.
Продуцентот и претходно изразил желба Деп повторно да го игра капетанот Џек Спероу, истакнувајќи дека токму актерот му дал препознатлив лик и го обликувал неговиот единствен изглед и карактер.
