Џорџ Клуни првпат јавно проговори за смртта на Пресли Гербер, синот на неговите блиски пријатели Синди Крафорд и Ранде Гербер.
Трагедијата што се случи минатиот месец, Џорџ Клуни ја опиша како „најлошото нешто што може да му се случи на едно семејство“.
Тој ја даде изјавата во петокот вечерта, на доделувањето на наградите „Алби“, каде што се појави со сопругата, адвокатката за човекови права Амал Клуни, пренесува Page Six.
„Искрено, тоа е една од најтешките работи што го погодиле нашето семејство“, изјави Клуни за Entertainment Tonight.
Зборувајќи за тоа како родителите на Пресли се справуваат со загубата на синот, тој накратко додаде: „А нивното семејство... можете само да замислите“.
Пресли Гербер почина на 20 септември, на 27-годишна возраст. Во моментот на смртта престојувал во луксузната установа „Resolutions Living“ во Санта Моника, наменета за лица кои се опоравуваат од зависности.
Постои сомнеж за предозирање, но официјалната причина за смртта сè уште не е потврдена.
Според извори на порталот Page Six, Пресли пристигнал во установата истиот викенд кога починал, а бил пронајден во една од спалните соби. Порталот дошол и до аудиоснимка од комуникацијата на итните служби, во која се споменуваат „срцев застој“ и „предозирање“.
Неколку дена по неговата смрт се појавила и снимка што Пресли самиот ја направил во установата, само неколку часа пред да почине.
По трагедијата, претставник на семејството изјавил дека тие молат за приватност „во овој исклучително тежок и болен период“.
Еден од изворите на порталот Page Six навел дека Пресли се однесувал необично во периодот пред смртта, додека друг открил дека неговата помлада сестра, 25-годишната манекенка и актерка Каја Гербер, исклучително тешко се справува со загубата на братот.
„Каја и Пресли беа неверојатно блиски. Не знам како ќе продолжи без него“, изјавил изворот.
Семејствата Клуни и Гербер се блиски веќе со децении. Џорџ Клуни и Ранде Гербер се долгогодишни пријатели и деловни партнери кои заедно го основале брендот на текила „Casamigos“.
Според извор на Daily Mail, Каја го нарекувала актерот „чичко Џорџ“, а Клуни бил особено близок со Пресли. Наводно, умеел со часови да разговара со него и да му испраќа пораки за поддршка, како што е: „Тука сум за тебе“.
„Џорџ е најљубезниот човек на светот и би направил сè за да му помогне на семејството на Ранде“, изјавил еден извор.
Друг извор за Page Six открил дека актерот е „целосно скршен од смртта на Пресли“.
„Го познаваше цел живот и никогаш не можеше да замисли дека ова ќе се случи“, изјавил изворот, додавајќи дека Клуни е решен да им биде поддршка на Синди и Ранде не само сега, туку и во следните месеци и години.
