Nintendo нема намера да ги укине физичките изданија на видеоигрите и покрај тоа што индустријата сè повеќе се насочува кон дигитална содржина. Компанијата потврди дека на корисниците на конзолата Nintendo Switch 2 ќе им овозможи избор меѓу физички касети и дигитално преземање на игрите.
За ова зборуваше Бил ван Зил, потпретседател и генерален директор на Nintendo за Латинска Америка, во разговор за каналот на YouTube „Coelho no Japão“, за време на настанот Brasil Game Show.
Тој објасни дека компанијата традиционално ги зема предвид желбите на потрошувачите и настојува да им понуди флексибилност. Ван Зил посочи дека Nintendo Switch 2 е релативно нова платформа што ги поддржува и физичките и дигиталните изданија.
„Немаме планови да ги напуштиме физичките изданија. Знаеме колку многу ги сакаат обожавателите, па нашиот став е да останеме флексибилни“, изјави Ван Зил.
Сепак, тој не ја исклучи целосно можноста ставот на компанијата да се промени во иднина.
Покрај стандардните физички изданија, Nintendo Switch 2 поддржува и таканаречени Game-Key картички. Тие не ја содржат целата игра, туку служат како клуч за нејзино преземање од интернет. За играњето да биде возможно, картичката мора да остане во конзолата и по преземањето на играта.
