Докторката Рај Арора предупредува дека одредени суптилни симптоми може да укажуваат на дијабетес, но често остануваат незабележани бидејќи многумина ги припишуваат на замор или на секојдневни тегоби.
Во видео објавено на платформата ТикТок, таа истакна дека дијабетесот често се развива постепено и може да остане недијагностициран со месеци, па дури и со години, поради што е важно навремено да се препознаат предупредувачките знаци.
Еден од најчестите симптоми, според докторката, е постојаното чувство на жед. Овој симптом често е проследен со зачестено мокрење, што може да биде показател за зголемено ниво на шеќер во крвта.
Арора посочува дека упорното чувство на замор, дури и по оброк, исто така може да биде знак за дијабетес. Дополнително, повремено заматување на видот, кое се појавува и исчезнува, може да биде поврзано со промените на нивото на шеќер во крвта што влијаат врз очите.
Како уште еден можен предупредувачки знак, таа го наведува и бавното зараснување на исекотини и рани. Кај некои луѓе може да се јави и чувство на глад кратко време по јадење, иако докторката нагласува дека овој симптом не е присутен кај сите лица со дијабетес.
Од друга страна, кашлицата и покачената телесна температура, според неа, најчесто не се поврзани со дијабетес.
Лекарите советуваат секој што ќе забележи некој од овие симптоми да се консултира со својот матичен лекар, со цел навремено поставување дијагноза и започнување соодветен третман.
