Туниската фудбалска репрезентација беше елиминирана уште во групната фаза на Светското првенство, а сега се најде во центарот на допинг-скандал.
Според британскиот „Дејли мејл“, дури осум туниски репрезентативци биле позитивни на кленбутерол при допинг-контролите спроведени за време на турнирот.
Светската антидопинг агенција (ВАДА) веднаш отворила истрага за да го утврди потеклото на забранетата супстанца. Првичните информации укажуваат дека не станува збор за намерно користење допинг, туку за консумирање контаминирано месо за време на престојот на делегацијата во Мексико.
Иако постапката сè уште официјално не е завршена, а клубовите на фудбалерите веќе се известени за резултатите, засега сè укажува дека играчите нема да бидат суспендирани. Антидопинг правилата предвидуваат ослободување од санкции доколку се докаже дека позитивниот наод е последица на случајна контаминација на храната.
Сличен случај беше забележан и во 2011 година на Голд купот, кога петмина мексикански репрезентативци исто така беа позитивни на кленбутерол по консумирање контаминирано месо, по што, по спроведената истрага, беа целосно ослободени од одговорност.
