Пет лица се повредени откако патнички авион од типот Airbus A320 на германската авиокомпанија Eurowings влетал во силна турбуленција во воздушниот простор во близина на Сараево.
Според специјализираниот воздухопловен портал, инцидентот се случил на 30 мај за време на летот од Родос кон Келн. Авионот летал на височина од околу 10.970 метри кога добил одобрение да се искачи на повисоко ниво на лет.
Во истиот воздушен коридор пред него се движел Airbus A380-800 на авиокомпанијата Emirates, кој летал од Дубаи кон Лондон.
За време на искачувањето, авионот на Eurowings ненадејно го прекинал маневарот и почнал нагло да се спушта. Според првичните информации, леталото влегло во комбинација од атмосферска турбуленција и силни воздушни вртлози што ги оставил поголемиот авион A380.
Во инцидентот полесно биле повредени четворица патници и една стјуардеса. Според извештаите, членката на кабинскиот персонал во најкритичниот момент била фрлена кон таванот на кабината.
Екипажот сепак го продолжил летот кон Келн, каде по слетувањето биле подготвени медицински екипи. Повредените најпрво добиле помош во авионот, а потоа биле префрлени во болница на дополнителни прегледи.
Надлежните истражни служби ги презеле снимачот на разговори во пилотската кабина и снимачот на параметрите на летот за да ги утврдат точните околности на инцидентот.
Авионот на Emirates безбедно го продолжил летот кон Лондон, додека леталото на Eurowings останало на земја во Келн околу четири и пол часа пред повторно да биде вратено во сообраќај.
