Dyson претстави нова високотехнолошка четка за заби со вградена камера, која користи вештачка интелигенција за попрецизно чистење на забите.
Dyson CameraJet има макрокамера со 100.000 пиксели, која преку технологијата Gap Optical Targeting ги препознава празнините меѓу забите во реално време и овозможува насочено чистење.
Уредот користи конусен млаз кој испушта прецизно насочени млазници течност за нежно отстранување на насобраниот плак меѓу забите. Корисникот треба да ја нанесе пастата за заби Dyson која не пени и го спречува создавањето кариес, а четката се користи со бавни, мали овални движења.
Преку апликацијата MyDyson корисниците можат во живо да го следат процесот на чистење, со снимки од камерата и упатства за правилно користење.
Од Dyson наведуваат дека четката во режимот Brush and Auto-jet била клинички тестирана со 71 учесник во период од четири недели, при употреба двапати дневно и со производи на Dyson, во споредба со рачна четка за заби.
За користење на четката потребни се интернет-конекција, Wi-Fi и апликацијата MyDyson.
За ваквото технолошко чистење на забите ќе треба да се издвојат околу 500 долари.
