Раперот Џеј-Зи проговори за тужбата за сексуално злоставување од 2024 година, како и за влијанието што таа го имала врз неговото семејство и менталното здравје.
Иако тужбата била повлечена по неколку месеци – целиот процес, тврди тој, бил „емоционално исцрпувачки“.
По повод цели три децении на сцената, Џеј-Зи за „GQ“ се обидел да објасни како соочувањето со обвинувањата влијаело врз неговата стабилност и односи. Иако веднаш по тужбата нагласил дека „ништо од тоа не се случило“, „целата приказна била исклучително интензивна и емоционалнa“.
„Бев многу повреден. Бев лут на начин на кој долго време не сум бил... Чувствував гнев што не знаев лесно да го контролирам“, признал тој во интервјуто, додавајќи дека покрај јавниот притисок, бил загрижен и за последиците што „целата ситуација ќе ги остави врз неговите најблиски“.
„Првата личност на која морав да ѝ кажам беше сопругата (Бијонсе). Знаев дека тоа ќе влијае врз нашето дете, врз целото семејство и не можев да ја игнорирам тежината на тоа...“, изјавил тој во врска со обвинувањата што се појавиле во момент кога неговата ќерка Блу Ајви имала премиера на својот филм.
„Тоа беше ситуација што многу ме исцрпи. Бев лут, повреден; ментално исцрпен. Никој не треба да поминува низ такво нешто. Иако обвинувањата не беа вистинити, емоционалниот ефект беше реален, врз мене и моето семејство... Знаев дека ќе го поминеме тоа бидејќи, пред сѐ, не е вистина. И на крајот од денот, вистината е таа што останува“, изјави раперот.
„Семејството е цврст темел на сѐ што правам. Сакам да ги носам на училиште, да ги гледам како растат. Тоа ми дава смисла. Сѐ друго е секундарно; семејството дава причина зошто се трудиме и се бориме“, рече тој, нагласувајќи дека „вакви сериозни обвинувања не смеат да се изнесуваат туку-така“.
„Тоа не е нешто што се става на некого без целосна сигурност. Пред една деценија постоеја правила – не ги допирај жените, не ги допирај децата. Тоа го научив од улица и за мене беше свето. Кога вакви работи се пласираат, оставаат долготраен траг“, изјави Џеј-Зи.
