Актерките Џенифер Анистон и Лиса Кудроу повторно се сретнаа за да разговараат за култната серија Friends, присетувајќи се на незаборавните моменти од снимањето, гостувањата на големи холивудски ѕвезди и пријателството што трае со децении.
Во разговорот беше споменат и Бред Пит, кој гостуваше во една од најпознатите епизоди на серијата.
Кудроу ги издвои епизодите за Денот на благодарноста како едни од најомилените, а особено ја спомена онаа во која се појави Пит.
„Да, епизодите за Денот на благодарноста беа одлични. Кога Бред беше во серијата, тоа беше урнебесно“, изјави Кудроу, на што Анистон кусо одговори: „Знам. Беше навистина многу смешно.“
Анистон се присети и на другите славни гости во серијата, меѓу кои Брус Вилис, Џулија Робертс, Изабела Роселини и Шон Пен.
„Филмските ѕвезди кои доаѓаа во ‘Пријатели’ секогаш беа нервозни. Тоа ми беше фасцинантно“, рече Анистон.
Пит се појави во деветтата епизода од осмата сезона, насловена The One with the Rumor, каде го толкуваше ликот Вил Колбер, поранешен соученик на Рос и Моника кој не ја поднесуваше Рејчел Грин и ширеше непријатни гласини за неа.
Анистон и Пит ја започнаа својата врска во 1998 година, се верија во 1999, а се венчаа една година подоцна. Нивниот брак заврши во 2005 година.
