Со доаѓањето на потоплите денови, инсектите стануваат сè поактивни и честопати влегуваат во домовите во потрага по храна и засолниште. Наместо употреба на силни хемиски препарати, постои едноставен природен раствор кој може да помогне да ги одвратите.
Главната состојка е кајенскиот пипер, кој поради капсаицинот што го содржи делува одбивно за многу видови инсекти. За подготовка на растворот ќе ви бидат потребни околу четири литри вода, четири лажици кајенски пипер, малку детергент за миење садови и шише со распрскувач.
Во кофа измешајте ги водата и кајенскиот пипер, а потоа додадете мала количина детергент за миење садови, кој ќе помогне растворот подобро да се задржи на површините. Смесата оставете ја да отстои преку ноќ, но задолжително чувајте ја подалеку од деца и домашни миленици, бидејќи капсаицинот може да биде штетен за животните.
Следниот ден растворот префрлете го во шише со распрскувач. По желба, може претходно да го процедите за да ги отстраните поголемите честички. Остатокот чувајте го во добро затворен сад на ладно место.
Испрскајте ги рамките на прозорците, балконските и влезните врати, односно местата низ кои инсектите најчесто влегуваат во домот. Растворот може да се користи и за заштита на растенијата, како што е виновата лоза, за да се намали појавата на лисни вошки.
За најдобар ефект, прскањето се препорачува да се врши во вечерните часови, кога сонцето е послабо и растворот нема брзо да испари.
