Необични морски животни сè почесто се појавуваат покрај брегот на Калифорнија, каде што минатиот месец за првпат била забележана долгоперка крупноока риба, а на локалните плажи за првпат се регистрирани гнезда на морски желки. Во меѓувреме, до брегот допливала и отровна жолтостомачна морска змија, додека кит-ајкули и чекан-ајкули се движат недалеку од копното.
Меѓу необичните посетители на калифорниските води се и летачките риби и морските ражи.
Појавата на тропски морски видови се поврзува со невообичаено силниот временски феномен Ел Нињо, кој се развил оваа година. Оваа природна појава, што се јавува на секои неколку години, носи потопла морска вода од југ кон север, заедно со видовите што вообичаено живеат во тропските предели.
Нивното присуство создава необични глетки покрај калифорнискиот брег, кои стануваат сè позабележителни благодарение на развојот на технологијата за снимање со беспилотни летала и видеокамери.
Уште пред пристигнувањето на Ел Нињо, Калифорнија се соочила со невообичаен морски топлотен бран. Овогодишниот феномен се совпаднал и со серија урагани во источниот дел на Тихиот Океан, што придонело за покачување на нивото на морето и создавање големи бранови. Тие уништиле куќи, а на некои плажи во јужна Калифорнија го однеле песокот. Поради очекуваните последици во текот на зимата, властите прогласиле вонредна состојба.
Научниците очекуваат условите главно да се нормализираат откако Ел Нињо ќе заврши следната година. Сепак, краткорочната штета би можела најмногу да ги погоди подводните шуми од келп, кои успеваат во постудени води и обезбедуваат живеалиште за бројни морски видови.
„Ова е добро за некои видови ајкули, а веројатно лошо за други“, изјавил Крис Лоу, директор на Лабораторијата за истражување на ајкули при Државниот универзитет во Калифорнија, во Лонг Бич.
Тој посочил дека поголем проблем имаат животните што не можат да се движат на големи растојанија, додека повеќето ајкули се подвижни и можат да се преселат во други води.
Еден од необичните случаи е појавата на жолтостомачна морска змија, која има отровни заби, но не може да плива како големите ајкули. Во септември, една змија што изгледала болно допливала до брегот во округот Оринџ. Посетител на плажата ја подигнал со палмов лист и ја вратил во морето.
Врз основа на видеоснимка направена со мобилен телефон, истражувачот Јарос изразил речиси целосна сигурност дека станува збор за жолтостомачна морска змија, позната под научното име Hydrophis platurus.
Во Калифорнија досега се потврдени само шест или седум појавувања на овој вид, изјавил Вилијам Лудт, помошник-куратор за ихтиологија во Природонаучниот музеј на округот Лос Анџелес. Последното потврдено забележување било во периодот на Ел Нињо во 2015 и 2016 година.
За време на Ел Нињо, во калифорниските води навлегуваат и необични видови ајкули, меѓу кои и кит-ајкулата, најголемата риба во светот, која е мирољубива, како и чекан-ајкулите, препознатливи по карактеристичната форма на главата.
Особено значајно откритие било пронаоѓањето две гнезда на маслинести ридли-морски желки во септември на две плажи во округот Оринџ. Според податоците на американската Национална управа за океани и атмосфера, ова е првпат да биде забележано гнездење на морски желки од кој било вид на западниот брег на САД.
Првото гнездо го открил посетител на плажата во Сил Бич на 16 септември, а три дена подоцна спасувачи го пронашле второто на соседната плажа Хантингтон Бич.
Научниците не ја исклучуваат можноста во калифорниските води да се појават и други необични видови.
„Сè уште не сме го поминале целосно овој феномен. Тој и понатаму е многу присутен“, изјавил Лудт.
