Една од најнеобичните детали во филмот „Верити“ барала прилично необична подготовка. Дакота Џонсон и Ен Хатавеј навистина гризеле дрво за да се создадат уверливи траги од заби на узглавјето на креветот.
Џош Хартнет за „Entertainment Weekly“ открил дека тој можел да си оди дома, додека неговите колешки на сетот поминувале време обидувајќи се совршено да ги изведат трагите од гризење.
„Бевме само Ени и јас, во различни денови, и гризевме дрво“, се присетила Џонсон. Хартнет потоа доаѓал на сетот и гледал „целата колекција различни траги од заби“.
Во романот на Колин Хувер, како и во филмската адаптација „Верити“, која пристигна во кината, првите траги од заби се појавуваат за време на интимниот однос меѓу Верити, која ја игра Ен Хатавеј, и нејзиниот сопруг Џереми, кого го толкува Хартнет.
Кога Лоуен, ликот на Дакота Џонсон, се вселува во нивниот дом за да ја продолжи работата на Верити, меѓу неа и Џереми се развива љубовна врска. Лоуен потоа остава свои траги на узглавјето за да покаже дека го смета креветот за свој.
Иако во книгата овој детаљ е опишан во само една реченица, неговото пренесување на филмското платно барало внимателна подготовка.
Хатавеј објаснила дека таа и режисерот Мајкл Шоуалтер детално разговарале за тоа како треба да изгледаат трагите.
„Не оставивме ништо на случајност. Моравме да утврдиме која нијанса на дрво е соодветна. Требаше да биде нешто што навистина може да биде дел од кревет, но и доволно меко за да може да се гризе“, рекла таа.
За Џонсон, покрај тоа што сцената требало да изгледа уверливо и заводливо, постоел и практичен проблем – да не ги повреди сопствените заби.
„Како да изгледа секси, а да не ги изгубам забите?“, се пошегувала актерката.
Поради тоа, продукцијата користела помека дрвена површина, додека Шоуалтер посочил дека било важно сцената да ја задржи својата сензуалност.
И самата авторка на романот, Колин Хувер, се осврнала на необичниот детаљ, кој првично бил само една реченица во книгата, но со текот на времето станал еден од препознатливите мотиви на приказната.
Хувер вели дека не очекувала тој момент да стане толку значаен, а особено ѝ било забавно што завршил и во филмот, па дури и на чаша за вино.
