Европската комисија ги вброи ChatGPT, Reddit и Roblox меѓу услугите што подлежат на најстрогите правила според Законот за дигитални услуги (DSA), поради нивниот број на корисници и значителното влијание врз корисниците и општеството.
ChatGPT е означен како многу голем онлајн пребарувач, додека Reddit и Roblox се класифицирани како многу големи онлајн платформи.
„Овие нови ознаки значат дека ChatGPT, Reddit и Roblox сега ќе бидат предмет на повисоко ниво на контрола и одговорност во Европската Унија, во согласност со нивното значително влијание врз нашите граѓани и општеството“, изјави Хена Виркунен, извршна потпретседателка на Европската комисија за технолошки суверенитет.
Трите услуги пријавиле дека имаат најмалку 45 милиони просечни месечни корисници, што е еден од условите за добивање ваква ознака според DSA.
По одлуката, ChatGPT, Reddit и Roblox имаат четири месеци, односно до крајот на ноември, да почнат со исполнување на дополнителните обврски. Тие вклучуваат проценка и намалување на системските ризици поврзани со нивните услуги и алгоритми, вклучително и ризици од ширење незаконска содржина, негативни последици врз малолетниците, физичката и менталната благосостојба на корисниците, основните права, изборните процеси и јавната безбедност.
Со новите ознаки, Европската комисија добива и поголеми овластувања за надзор и истрага на функционалностите на овие услуги.
Комисијата го класифицира ChatGPT како хибридна услуга или онлајн пребарувач, бидејќи системот, покрај одговарањето на барањата на корисниците, може да врши и пребарувања на интернет.
Reddit им овозможува на корисниците да дискутираат и споделуваат содржини во различни тематски заедници, додека Roblox е платформа за игри и создавање содржини, на која корисниците можат да креираат, објавуваат и играат игри создадени од други корисници.
Со последната одлука, Европската комисија досега има означено вкупно 28 многу големи онлајн платформи и пребарувачи според DSA. Надзорот и спроведувањето на Законот за дигитални услуги ги делат Европската комисија и координаторите за дигитални услуги во земјите-членки.
