Канада се приклучува на европската мрежа на суперкомпјутери во рамките на соработката со Европската Унија за зајакнување на компјутерските капацитети потребни за развој на вештачката интелигенција.
Претседателката на Европската комисија, Урсула фон дер Лајен, потврди дека Канада станува дел од мрежата, со што канадските компании, стартапи и истражувачи ќе добијат пристап до европските суперкомпјутери.
„Во комбинација со напредната канадска индустрија за вештачка интелигенција, ова ќе ни овозможи да развиваме многу конкурентни, иновативни и безбедни системи“, изјави Фон дер Лајен.
Со европската мрежа управува заедничкото претпријатие „ЕуроХПЦ“, јавно-приватно партнерство на Европската Унија со буџет од 8,2 милијарди евра. Мрежата опфаќа 14 суперкомпјутери, од кои некои се меѓу десетте најмоќни во светот, 19 специјализирани фабрики за вештачка интелигенција и 10 квантни компјутери.
Во план е и изградба на седум големи центри за податоци за вештачка интелигенција, познати како „гигафабрики за ВИ“. Изградбата треба да започне следната година, а вкупната инвестиција се проценува на 30 милијарди евра.
Аналитичарите ја оценуваат соработката меѓу ЕУ и Канада како важен прв чекор во поврзувањето на технолошки развиените земји, но предупредуваат дека таа засега нема значително да ја намали зависноста од САД. Според експертот за технологија и меѓународни односи Антон Лајхт, вистински напредок ќе бара и масовни инвестиции во компјутерска инфраструктура.
Приклучувањето на Канада ја надградува нејзината досегашна соработка со ЕУ преку програмата „Хоризонт Европа“. Во европската мрежа на суперкомпјутери досега учествувале 38 земји, меѓу кои и држави што не се членки на Унијата, како Норвешка, Швајцарија, Обединетото Кралство, Израел и Турција.
