Европската комисија предлага нови правила со кои би се ограничил пристапот на децата и младите до социјалните мрежи, а воедно би се вовеле дополнителни обврски за онлајн платформите во однос на безбедноста на малолетниците.
Според предлогот на претседателката на Европската комисија, Урсула фон дер Лајен, на децата под 13 години би им било забрането самостојно да создаваат профили на социјалните мрежи и платформите за споделување видеа. За тинејџерите од 13 до 15 години се предлага значително ограничување на самостојното користење на овие услуги.
Предлогот е дел од таканаречениот „Закон на ЕУ за децата“ и има цел да ги намали потенцијалните штетни влијанија од онлајн платформите врз малолетниците. Покрај социјалните мрежи, мерките би опфатиле и други дигитални услуги, меѓу кои чет-ботови со вештачка интелигенција и видеоигри.
„Ако некоја платформа сака да допре до децата или тинејџерите, односно до малолетниците, таа прво мора да докаже дека е безбедна“, изјави Фон дер Лајен при претставувањето на предлогот.
Европската комисија сега треба да преговара со националните влади и со технолошки експерти за начинот на спроведување на новите правила, особено околу проверката на возраста. Една од клучните точки е како да се потврди возраста на корисниците без да се загрози нивната приватност.
Предлогот предвидува платформите, видеоигрите и чет-ботовите со вештачка интелигенција да ги применуваат принципите на „безбедност по дизајн“, со цел да се спречи поттикнување на компулсивно користење кај децата.
Во земјите членки веќе постојат различни пристапи кон минималната возраст за користење на социјалните мрежи. Франција бара ограничувања за лица под 15 години, додека Германија се залага за праг од 13 години. Холандија го поддржува предлогот на Комисијата, но претпочита минималната возраст да биде 15 години, додека Шпанија работи на воспоставување праг од 16 години.
Естонија, пак, се спротивставува на воведувањето забрани или старосни ограничувања, додека Италија досега исто така била против ваквите мерки.
Европската комисија очекува преговорите да бидат завршени во следните 8 до 12 месеци. Доколку законодавната постапка се одвива според планираното, новите правила би можеле да почнат да се применуваат во средината на 2028 година, по предвидениот преоден период од шест месеци.
Една од најголемите спорни точки останува проверката на возраста. Предлогот предвидува корисниците да ја докажуваат својата возраст, што според активистите за дигитални права може да создаде ризици за приватноста и безбедноста на личните податоци.
Од Европската комисија, пак, уверуваат дека системот треба да овозможи потврдување само на возраста, без откривање други лични информации. Хена Виркунен, надлежна за технолошки прашања во Комисијата, порача дека потврдувањето на возраста треба да биде едноставно и да не открива „ништо друго освен вашата возраст“.
Комисијата признава дека предложените правила не се совршени и дека можно е нивно заобиколување. Сепак, предлогот го претставува како прв чекор кон создавање построги стандарди за безбедноста на децата на интернет и промена на односот кон заштитата на малолетниците во дигиталниот простор.
