Европската комисија соопшти дека прелиминарно утврдила оти „ТикТок“ не обезбедил соодветна заштита на приватноста на децата на својата платформа, поради што малолетните корисници биле изложени на ризик од вознемирување, несакани контакти и предаторско однесување на интернет.
Според Комисијата, поставките на платформата им овозможувале на возрасни лица пристап до профилите на малолетници, што претставува прекршување на европските правила за дигитални услуги.
Истрагата против „ТикТок“ се води од февруари 2024 година во рамките на Актот за дигитални услуги (DSA), со кој се регулира работата на големите интернет-платформи во Европската Унија. Компанијата сега има можност да одговори на наодите, а доколку Европската комисија не биде задоволна од објаснувањето, може да донесе одлука за неусогласеност и да изрече казна до шест проценти од годишниот глобален приход на компанијата.
Ова не е првпат „ТикТок“ да се соочи со регулаторни мерки. Ирскиот регулатор за заштита на податоци во 2023 година ја казни компанијата со 345 милиони евра поради прекршување на правилата за заштита на личните податоци на децата, а подоцна ѝ беше изречена и казна од 530 милиони евра поради пренос на податоци на европски корисници во Кина.
