Македонија се враќа на евровизиската сцена во 2027 година, откако беше објавен списокот со 36 земји учеснички на 71-вото издание на музичкиот натпревар. Домаќин ќе биде бугарскиот град Бургас, каде што натпреварувањето ќе се одржи на 11, 13 и 15 мај.
Според објавениот список на Европската радиодифузна унија (ЕБУ), на Евровизија ќе учествува и Србија, додека Канада за првпат ќе биде дел од натпреварот. Македонија се враќа по четиригодишно отсуство.
Првото полуфинале е закажано за 11 мај, второто ќе се одржи на 13 мај, а големото финале е предвидено за 15 мај 2027 година.
На списокот се наоѓаат 36 земји, меѓу кои Албанија, Австралија, Австрија, Белгија, Велика Британија, Грција, Италија, Германија, Израел, Канада, Србија, Македонија, Хрватска, Црна Гора, Швајцарија и Шведска.
Од натпреварот се повлекуваат Ирска, Исланд, Холандија и Чешка. Одлуките на Ирска, Исланд и Холандија се поврзани со нивното противење на учеството на Израел, како и со незадоволството од начинот на кој ЕБУ се справува со политичките прашања и неутралноста на манифестацијата.
Учеството на Шпанија и Словенија сè уште не е конечно потврдено. Нивните јавни радиодифузни сервиси добиле дополнително време, до декември, за да одлучат дали ќе настапат во Бугарија.
Бургас го доби домаќинството откако бугарската пејачка Дара победи на Евровизија 2026 во Виена со песната „Бангаранга“. Тоа беше прва победа за Бугарија на овој натпревар, со што земјата го обезбеди правото да го организира следното издание.
Организаторите најавија дека дополнителните информации за водителите, сцената и придружните настани ќе бидат објавувани во наредните месеци.
