Европската радиодифузна унија (ЕБУ) воведува нови правила за Евровизија, меѓу кои и одредба според која земја вклучена во воен конфликт нема да може да биде домаќин на натпреварот, дури и ако нејзиниот претставник победи.
Новите правила биле одобрени од управното тело на Евровизија по повратните информации од јавните сервиси што учествуваа на изданието во 2026 година во Виена.
Според измените, победничката земја може да биде исклучена од домаќинството доколку „чувствителна геополитичка ситуација“ влијае врз безбедноста, сигурноста или стабилноста на земјата или непосредниот регион. Во таков случај, ЕБУ ќе може да побара независна безбедносна процена, а доколку се утврди дека не може безбедно да се организира натпреварот, ќе биде избрана друга земја домаќин.
Промените доаѓаат по реакциите околу учеството на Израел на Евровизија 2026, во услови на критики поврзани со воените дејствија во Газа и на Блискиот Исток. И покрај протестите и најавените бојкоти од неколку национални телевизии, израелскиот претставник Ноам Бетан го освои второто место.
Новото правило, сепак, не се однесува само на Израел. Тоа би можело да има последици и за Украина, која е во војна од почетокот на руската инвазија во 2022 година.
ЕБУ воведе и други промени. Минималната возраст за учество на Евровизија е зголемена од 16 на 18 години, а дополнително се појаснети правилата за користење придружни вокали од матрица.
Од следната година, однапред снимената вокална трака нема да смее да му помага на пејачот со главната мелодија или да го засилува главниот вокал во текот на настапот.
„Одлуката има за цел да ја заштити автентичноста на секој настап и публиката секогаш да го слуша главниот вокал во живо“, соопштија од ЕБУ.
Следното издание на Евровизија ќе се одржи во Бугарија, откако нејзината претставничка Дара победи на натпреварот во 2026 година со песната „Bangaranga“. На следното издание за првпат ќе учествува и Канада.
