Корисниците на „Фајрфокс“ на „ајфон“ наскоро би можеле да добијат нова опција за блокирање реклами без инсталирање дополнителни екстензии. „Мозила“ тестира вграден блокатор на реклами кој може да спречува реклами, следење, искачувачки прозорци и други наметливи елементи.
Експерименталната функција е наменета за апликацијата „Фајрфокс“ за iOS и овозможува блокирање на различни видови реклами директно на мрежно ниво. Системот може да блокира рекламни мрежи од трети страни, елементи за следење поврзани со реклами, реклами на интернет-страници, како и искачувачки прозорци и видео-преклопувања.
„Мозила“ сепак предупредува дека блокаторот нема да може да ги отстрани сите реклами, бидејќи интернет-страниците користат различни технологии за нивно прикажување. Нема да бидат блокирани ниту рекламите што се појавуваат во резултатите од пребарувањето, како и спонзорираната содржина што ја прикажува самиот „Фајрфокс“.
Функцијата засега е исклучена по дифолт и постепено се активира кај избрани корисници бидејќи сè уште е во експериментална фаза. Корисниците кај кои е достапна можат да ја вклучат преку поставките на „Фајрфокс“, во делот за прелистување и содржина.
За блокирање на рекламите „Мозила“ користи листа на филтри заснована на „EasyList“, со цел дел од рекламите да бидат блокирани пред воопшто да се вчитаат.
Сè уште не е познато кога вграденото блокирање реклами ќе стане достапно за сите корисници на „Фајрфокс“ на iOS.
