FIFA воведува нова традиција на Светското првенство, па освојувачот на титулата во 2026 година, покрај трофејот и златните медали, за првпат ќе добие и шампионски прстени.
Како што објави FIFA, по финалето меѓу Шпанија и Аргентина, победничката репрезентација ќе биде наградена со специјално изработени прстени, што претставува преседан во историјата на натпреварувањата под капата на светската фудбалска организација.
Ќе бидат изработени вкупно 2.026 нумерирани примероци, како симбол на годината во која се одржува Мундијалот. Од нив, 30 прстени се наменети за членовите на шампионската репрезентација, додека преостанатите 1.996 ќе бидат пуштени во продажба како официјален лиценциран сувенир за навивачите.
На едната страна од прстенот ќе биде прикажан трофејот на Светското првенство, а другата ќе биде приспособена на визуелниот идентитет на репрезентацијата што ќе ја освои титулата. Секој прстен ќе има единствен сериски број, ќе биде изработен по мерка и ќе биде испорачан со сертификат за автентичност.
Финалето на Светското првенство ќе се одигра в недела, на 19 јули, на стадионот „MetLife Stadium“ во Њу Џерси. Веднаш по натпреварот, капитенот и селекторот на новиот светски шампион ќе добијат привремени примероци од прстените, а потоа сите 30 ќе бидат персонализирани за секој член на тимот.
Шампионските прстени со децении се еден од најпрепознатливите симболи на успехот во американскиот професионален спорт, особено во лигите NFL, NBA, MLB и NHL. Со нивното воведување, FIFA дополнително го истакнува американскиот печат на Светското првенство, чии домаќини се САД, Канада и Мексико.
