Новиот филм „Unabomber“ за само четири дена по објавувањето на „Netflix“ стигна до првото место на листата на најгледани филмови, иако доби главно негативни оценки од филмските критичари.
Филмот е биографски криминалистички трилер инспириран од вистински настани и го прикажува животот, психолошката трансформација и злосторствата на американскиот терорист Тед Качински.
Приказната се одвива низ две временски линии. Едната го следи младиот Качински, математички гениј кој на само 16 години се запишал на Харвард. Филмот се осврнува и на неговото учество во психолошките експерименти на професорот Хенри Мареј, поврзани со тајни истражувања на проектот MKUltra.
Втората линија го следи Качински во подоцнежниот период, кога живее изолиран во дрвена колиба во Монтана и изведува серија напади со бомби испратени по пошта, насочени кон универзитети, научници и авиокомпании.
Филмот ја прикажува и истрагата на ФБИ и профилирањето на сторителот преку анализа на неговиот радикален манифест против технологијата.
Младиот Тед Качински го игра Џејкоб Тремблеј, додека постариот Качински го толкува Анеурин Барнард. Улогата на професорот Хенри Мареј му припадна на Расел Кроу.
И покрај интересот на публиката, филмот доби слаби оценки од критичарите. На „Rotten Tomatoes“ моментално има оценка од 23 отсто од критичарите, додека публиката му дала 51 отсто.
Критичарите најмногу ја критикуваат приказната поради тоа што двете временски линии, периодот на Харвард и подоцнежната истрага на ФБИ, според нив, не се доволно добро поврзани. Дел од нив сметаат и дека односот меѓу психолошките експерименти и подоцнежните злосторства на Качински е прикажан премногу поедноставено.
Сепак, интересот кај гледачите е значително поголем, па „Unabomber“ за само четири дена се искачи на првото место на листата на најгледани филмови на „Netflix“.
