Туристичка организација од Финска објави необичен оглас за работа, барајќи личност што ќе ги проценува мирисите на архипелагот Турку и ќе помогне да се утврди дали ова подрачје навистина има најубави мириси во светот.
Избраниот кандидат ќе работи од пет до седум дена во мај или јуни 2027 година, за што е предвиден бруто-надомест од 2.000 евра, плус законски надомест за годишен одмор. Организаторите ќе ги покријат и патните трошоци и сместувањето.
Задачата на избраниот „експерт за мириси“ ќе биде да ги истражи островите и да ги оцени различните мириси на регионот – од морскиот воздух и боровите шуми до сауните и свежо печениот леб. Своите впечатоци ќе треба да ги опише на интересен и уверлив начин, како и да ги документира со фотографии и видеоснимки. Материјалите ќе ги користи туристичката организација за објавување на социјалните мрежи и на други канали.
За оваа работа не е потребна диплома од училиште за парфимерија, но кандидатите мора да имаат најмалку 18 години, право на работа во Финска во времето на пријавувањето и за време на ангажманот, соодветна опрема за снимање и можност да бидат достапни во текот на целиот договорен период.
Од нив се очекува и да се чувствуваат удобно пред камера, да умеат прецизно да ги опишуваат мирисите и да ја задржат заинтересираноста на публиката. При изборот ќе се оценуваат начинот на препознавање и опишување на мирисите, презентациските способности и присуството на социјалните мрежи.
Заинтересираните треба да објават кратко видео за пријавување на Инстаграм или ТикТок. Во него треба да се претстават, да изберат предмет, да го помирисаат и да ги опишат своите впечатоци.
Крајниот рок за пријавување е 25 октомври на полноќ, според финското време. Кандидатите ќе бидат известени за исходот по електронска пошта најдоцна до 10 ноември, а името на избраниот кандидат треба да биде објавено на 17 ноември.
Туристичката организација „Визит Турку Архипелаго“ сака на креативен начин да ја провери својата теза дека архипелагот Турку има најубави мириси во светот. За необичната работна задача, како што порачуваат организаторите, потребно е само едно – добар нос.
